„Рафал“ го следел патничкиот авион до италијанската граница по дојава за можна закана

Хрватски борбен авион „Рафал“ пресретнал патнички авион на финската авиокомпанија „Финер“ по дојава за можна бомба во леталото. Борбениот авион го следел патничкиот „Ербас А320“ до границата со Италија, каде што контролата била предадена на италијанските воздухопловни сили.

— реклама —

Пресретнувањето се случило денеска во 8:41 часот, во рамките на операцијата за надзор и заштита на хрватскиот воздушен простор. Авионот на „Финер“, кој летал од Хелсинки кон Рим, влегол во хрватскиот воздушен простор во 8:34 часот, меѓу Чаковец и Вараждин, и продолжил кон Истра и Италија.

— реклама —

Постапката била покрената по дојава за можна опасност, односно сомнеж дека во авионот има експлозивна направа. По наредбата за дејствување и полетувањето од базата, хрватскиот „Рафал“ го пресретнал патничкото летало во областа меѓу Јастребарско и Карловац.

Борбениот авион го придружувал „Ербас А320“ до границата со Италија, каде што леталото било предадено на италијанските сили за брз одговор. Акцијата била спроведена по наредба на Здружената воздушна команда на НАТО во Торехон. Авионот на „Финер“ го напуштил хрватскиот воздушен простор во 8:54 часот.

— реклама —

Ова е второ успешно пресретнување на патнички авион во Хрватска од почетокот на годината. Претходно, хрватски „Рафал“ пресретнал и патнички авион „Боинг“ од Малта, кој исто така бил означен како можна закана.

— реклама —

Хрватското воено воздухопловство од 1 јануари 2026 година самостојно го надгледува и го штити воздушниот простор на земјата со повеќенаменските борбени авиони „Рафал“, во рамките на интегрираниот систем на НАТО за противвоздушна и противракетна одбрана.