Ирската нискобуџетна авиокомпанија Рајан ер објави силен раст на добивката и предупреди дека дел од послабите европски авиопревозници би можеле да банкротираат поради кризата со горивото.
Компанијата соопшти дека добивката по оданочување пораснала за 40 проценти и достигнала речиси 2,3 милијарди евра во деловната година што завршила во март.
Во истиот период бројот на патници се зголемил за четири проценти и достигнал 208,4 милиони.
Главниот финансиски директор на Рајан ер, Нил Сорехан, изјави дека компанијата има подготвени планови и за најлоши сценарија поради растот на цените на авионското гориво.
Тој предупреди дека зимскиот период би можел да биде кобен за некои европски авиокомпании што и претходно имале финансиски проблеми.
„Мислам дека ќе видиме како дел од послабите превозници веројатно ќе пропаднат во текот на зимата“, изјави Сорехан.
Рајан ер наведе дека обезбедил 80 проценти од потребното гориво за летната сезона по фиксна цена, што, според компанијата, ѝ дава предност во услови на нестабилен пазар.
Извршниот директор Мајкл О’Лири претходно предупреди дека доколку цената на нафтата остане висока, може да дојде до „вистински пропасти“ на европските авиокомпании.
И покрај растот на добивката и бројот на патници, приходите на Рајан ер се намалиле за 11 проценти и изнесувале 15,54 милијарди евра.
