Ракета на американската вселенска компанија „Блу ориџин“ експлодирала за време на таканаречен „hot-fire“ тест, кој се изведува на земја со активирање на моторите додека леталото е прицврстено за лансирната рампа.
Основачот на компанијата, Џеф Безос, на социјалната мрежа Икс соопшти дека сите вработени се безбедни и дека е прерано да се утврди причината за несреќата.
„Сите вработени се на број и се безбедни. Прерано е да се знае основната причина, но веќе работиме на нејзино утврдување. Ова е многу тежок ден, но ќе обновиме сè што е потребно и ќе продолжиме со летовите“, напиша Безос.
Службата за вонредни ситуации на округот Бревард го опиша инцидентот како „аномалија“, која не претставува опасност за населението.
Експлозијата се случила само еден ден откако администраторот на НАСА, Џеред Ајзакмен, ја пофали компанијата за нејзината значајна улога во програмата Артемис, чија цел е враќање на американски астронаути на Месечината до 2028 година.
Ајзакмен претходно соопшти дека НАСА ѝ доделила на „Блу ориџин“ договор вреден 188 милиони долари за поддршка во изградбата на идната база на Месечината.
По инцидентот, тој изјави дека НАСА е запознаена со случајот и дека дополнително ќе информира за евентуалните последици врз програмите „Артемис“ и изградбата на месечевата база.
„Вселенските летови не простуваат грешки, а развојот на нови ракети со голема носивост е исклучително сложен процес“, истакна Ајзакмен, додавајќи дека НАСА ќе соработува со партнерите во истрагата и ќе продолжи со подготовките за идните мисии.
