Изјавата на украинскиот претседател Володимир Зеленски дека Украина нема да ја признае независноста на Косово предизвика реакции во регионот, а во дебатата се вклучи и албанскиот премиер Еди Рама.
Зеленски минатата недела престојуваше во Белград, каде што за првпат се сретна со српскиот претседател Александар Вучиќ. По средбата, тој порача дека ставот на Украина кон Косово не е променет и дека Киев нема да ја признае неговата независност.
По оваа изјава, од Косово следуваше реакција. Од главната сообраќајница во Приштина беше отстранет голем транспарент во сино-жолта боја со натпис „Free Ukraine“, кој беше поставен во 2022 година. Градоначалникот на Приштина, Перпарим Рама, порача дека сочувствува со народите кои се соочуваат со војна, насилство и прогон, но нагласи дека „почитта мора да биде заемна“.
За случувањата се огласи и Еди Рама, кој порача дека Албанија не треба да ја менува својата поддршка за Украина поради несогласувањето со ставот на Киев за Косово.
Според Рама, поддршката за Украина и ставот за Косово можат да постојат истовремено. Тој оцени дека спротивставувањето на агресијата и поддршката за праведен мир не треба да се условуваат со политички очекувања или со тоа дали некој став ќе биде возвратен.
„Украина може да биде, и да, е во заблуда кога станува збор за Косово. Но, нејзиното право на слобода останува неспорно“, порача Рама.
Тој додаде дека Албанија е доволно зрела да ги прифати двете позиции – да го поддржува правото на Украина на слобода и истовремено да има свој став во однос на прашањето за Косово.
