Распишан тендер за 150 електрични автобуси, 100 за Скопје, од кои 30 да се испорачаат до септември

Министерството за транспорт објави јавен повик за набавка на 150 електрични еколошки автобуси и 75 полначи, со што започнува постапката за една од најавуваните инвестиции во јавниот превоз. Согласно планот, 100 автобуси се предвидени за потребите на Град Скопје, додека останатите 50 ќе бидат распределени во други општини во државата.

— реклама —

Според условите од повикот, најповолниот понудувач ќе има обврска да произведе и испорача 30 автобуси во рок од шест месеци од склучување на договорот, дополнителни 60 во рок од 12 месеци и уште 60 автобуси во рок од 18 месеци. Рокот за доставување на потребната документација од страна на заинтересираните економски оператори е до 30 март 2026 година.

— реклама —

— реклама —

Од Министерството за транспорт наведуваат дека набавката претставува јасна политичка определба за заштита на животната средина и за подобрување на ефикасноста на јавниот превоз во Скопје и во останатите општини. Покрај еколошките придобивки, се посочува и долгорочната економска исплатливост, имајќи ги предвид пониските трошоци за одржување и енергија во споредба со конвенционалните автобуси.

— реклама —

Надлежните оценуваат дека инвестицијата е дел од стратешки план за трансформација на градскиот сообраќаен систем и за зголемување на економичноста на транспортната мрежа. Со реализацијата на проектот, како што се наведува во соопштението, се испраќа јасна порака во насока на борба против аерозагадувањето и подобрување на условите за користење на јавниот превоз, како долгорочна инвестиција во транспортниот сектор и јавните услуги.