Кина одржа заеднички поморски и воздушни воени вежби во близина на спорниот гребен Скарборо во Јужното Кинеско Море, во услови на зголемени тензии со Филипините околу територијалните права во областа.
Според кинеската државна телевизија CCTV, целта на вежбите била да се провери способноста на вооружените сили за координирани воздушни и поморски операции, како и за брзо распоредување засилувања.
Воените активности следуваа откако Пекинг ја критикуваше одлуката на Филипините до Обединетите нации да поднесат барање за проширување на својот континентален гребен, со што би бил опфатен и спорниот гребен Скарборо. Кина, која гребенот го нарекува Хуангјен, смета дека барањето на Манила е незаконско и неважечко.
Во меѓувреме, кинеските власти објавија и нови правила за природниот резерват воспоставен околу спорната област, со кои се забрануваат неовластен риболов, рударски активности и вадење корали.
Во последниот период зачестија и инцидентите меѓу кинеската крајбрежна стража и филипинските морнари и рибари во спорните води. Само минатата седмица биле регистрирани најмалку три вакви случаи, а во еден од нив, според филипински извори, припадник на кинеската крајбрежна стража со палка повредил филипински морнар.
