Европските сојузници сè почесто предупредуваат на зголемениот ризик од руски хибридни активности, додека некои европски лидери изразуваат загриженост дека Москва во наредниот период би можела да прибегне и кон напади со беспилотни летала или ракети врз територијата на членки на НАТО.
Полскиот премиер Доналд Туск во четвртокот предупреди дека Русија би можела „во следните неколку месеци“ да испрати беспилотни летала или ракети кон земји членки на НАТО што ја поддржуваат Украина. Неговото предупредување го поддржа и францускиот претседател Емануел Макрон, кој оцени дека станува збор за предупредувања што се засновани на информации и најави нов план за заштита на критичната инфраструктура.
„Последните недели руската хибридна закана против Европејците и Франција се зголеми“, изјави Макрон.
Холандскиот премиер Роб Јетен порача дека предупредувањето на Туск треба да се сфати сериозно, додека финскиот претседател Александер Стуб изјави дека Европа треба да биде ментално подготвена за можноста да се случат инциденти, вклучително и саботажи и активности со руски беспилотни летала.
Во меѓувреме, Германија се подготвува за можен конфликт, Литванија ги ажурира плановите за евакуација, а НАТО спроведува воени вежби во Балтичкото Море. Белорусија, пак, одржува големи воени маневри во близина на границата со Литванија.
Загриженоста е дополнително засилена поради зачестените нарушувања на воздушниот простор и сомнежите за саботажи низ Европа. Сојузниците во НАТО овие инциденти ги разгледуваат како дел од поширок притисок од Москва со кој, според нивните проценки, се настојува да се ослаби европската поддршка за Украина.
Германските и шведските сили неодамна одржаа заедничка воена вежба во близина на стратешки важниот шведски остров Готланд. Неколку недели претходно, членки на НАТО одржаа ненадејни вежби во близина на руската енклава Калининград.
Во последните недели, борбени авиони на НАТО соборија руско беспилотно летало над Литванија, руски брод испука сигнални ракети кон дански воен хеликоптер, додека Германија за обид за напад со беспилотно летало врз аеродромот во Лајпциг обвини лице осомничено за руска шпионажа.
Москва, во меѓувреме, ја заостри реториката. Рускиот министер за надворешни работи Сергеј Лавров предупреди дека Европа би се соочила со „многу кратка“ војна доколку сојузниците од НАТО се обидат да ја нападнат Русија.
„Русија го забрза темпото на своите активности и мора да останеме внимателни“, изјави неименуван висок европски претставник за одбрана, додавајќи дека инцидентите може да се гледаат како дел од поширок тренд.
Сепак, во НАТО засега не велат дека постои непосредна опасност од руски напад. Литванскиот министер за надворешни работи Кестутис Будрис изјави дека Вилнус располага со исти разузнавачки информации како Туск за можна операција под лажно знаме, но посочи дека тие информации потекнуваат од јули.
Според двајца дипломати на НАТО, сојузниците официјално не биле известени за нови разузнавачки податоци, а Алијансата засега не ја променила проценката за заканата.
„Во моментов не гледаме непосредна закана од напад“, изјави претставник на НАТО, но истовремено порача дека Алијансата не смее да биде ниту наивна ниту опуштена и дека мора да остане силна во годините што следуваат.
Паралелно со воените и безбедносните подготовки, расте и бројот на регистрирани хибридни инциденти во Европа. Според податоците на украинскиот тинк-тенк „Сахаидачни безбедносен центар“, од јануари до август низ Европа биле потврдени 100 хибридни инциденти, наспроти 60 во истиот период минатата година.
Особено е зголемен бројот на нарушувања на воздушниот простор. Висок претставник на НАТО проценува дека вистинскиот број на инциденти е „лесно над 200“, без да се вклучат сајбер-нападите, кои, според него, само врз седиштето на Алијансата во Брисел ги има илјадници месечно.
„Бројките растат, сериозноста расте, а руската подготвеност да презема ризици е сè поголема“, заклучил претставникот.
