Поранешниот командант на Војската на Република Српска, Ратко Младиќ, на 29 јуни повторно ќе биде посетен од невропсихијатар од Србија, изјави неговиот син Дарко Младиќ за локалните медиуми.
Тој посочи дека специјалистот ќе ја процени здравствената состојба на Младиќ, а пред тоа и самиот ќе го посети заедно со својот помлад син.
Според Дарко Младиќ, здравствената состојба на неговиот татко во моментов е нешто подобра, иако и понатаму има сериозни потешкотии со говорот. Тој наведе дека семејството се обидува секојдневно да комуницира со него.
„Успеваме да размениме по неколку реченици. Мора буквално да ги извлекувате зборовите од него“, изјавил Дарко Младиќ, додавајќи дека разговорот претставува најважен дел од неговата терапија.
Ратко Младиќ, кој издржува доживотна затворска казна во Хаг, во изминатиот период претрпел повеќе мозочни удари, поради што значително му е нарушена способноста за говор.
Претседателката на Меѓународниот резидуален механизам за кривични судови, Грасиела Гати Сантана, во мај годинава го одби барањето Младиќ да биде префрлен на лекување во Србија. Во образложението беше наведено дека неговата здравствена состојба е сериозна поради хронични заболувања, но дека не станува збор за акутно влошување кое би наложило таква мерка.
Од 2024 година Младиќ се наоѓа во притворската болница во Хаг, а досега неколкупати беа одбиени барањата за негово привремено ослободување и лекување надвор од Холандија.
