Разбиена група провалници во Грција: Опљачкале 23 куќи и однеле 179.000 евра

Грчката полиција соопшти дека разбила криминална организација, чии членови биле странски државјани, кои извршиле 23 провали и кражби од куќи во областите Атина, Калитеа, Нео Фалиро и Спата.

Како што соопшти полицијата, осомничените однеле пари и предмети во вредност од 179.000 евра.

— реклама —

На подрачјето на Атика биле уапсени тројца странски државјани, членови на организацијата, а идентификувани се уште петмина членови, од кои двајца се наоѓаат во поправни установи, а тројца се во странство, пренесува „ЕРТ њуз“.

Истрагата утврдила дека осомничените, најмалку од јули 2025 година, формирале организација со цел професионално да ограбуваат куќи во областите на Атика.

— реклама —

Провалниците имале специјализирано знаење за различни видови клучеви и брави, што во неколку случаи им овозможувало да влезат во станови без да остават видливи траги од насилно влегување.

— реклама —

Со досегашната истрага биле опфатени вкупно 23 случаи на провали, кражби и обиди за кражба, извршени во Агија Параскеви, Палео Фалиро, Халандри, Неа Јонија, Галaци, Атина, Калитеа, Зографу, Петралона и Паграти.

При претресот на куќите и имотите на уапсените, меѓу другото, биле пронајдени и одземени големо количество накит, злато и вредни предмети, часовници од различни компании и дизајнерски чанти.

Запленети биле и голем број мобилни телефони и СИМ-картички, парфеми, камери, лаптопи, таблети, како и комплет посребрен прибор за јадење со дизајнирани рачки.

При претресите во становите на осомничените биле пронајдени и голем број алати за провалување, голем број клучеви од различни видови, картички и документи поврзани со услуги за трансфер на пари, како и лото-листи и други предмети, чие потекло се истражува.