Грчката полиција разби криминална организација која со специјализирани манипулации на електрични броила вршела кражба на електрична енергија во повеќе делови на земјата, при што е причинета штета поголема од девет милиони евра.
Според информациите од грчката полиција, досега се уапсени три клучни членови на организацијата, додека уште 105 лица се осомничени дека учествувале во незаконското користење електрична енергија.
Акцијата, која од раните утрински часови се спроведува во Солун во соработка со Операторот на дистрибутивната мрежа за електрична енергија (ДЕДДИЕ), е насочена кон разбивање на мрежа чии членови вршеле манипулации на електрични броила во деловни објекти и домови.
Како што соопшти полицијата, незаконските активности биле регистрирани во регионите Атика, Македонија, Тракија, Тесалија и Пелопонез.
„Досега се уапсени тројца клучни членови на организацијата, додека вкупно 105 лица се осомничени како извршители на кражби на струја. Штетата нанесена на ДЕДДИЕ надминува девет милиони евра“, информираа од грчката полиција.
Истрагата за случајот продолжува, а надлежните не ја исклучуваат можноста бројот на инволвирани лица дополнително да се зголеми.
