„Ребалансот не нуди реформи и развој, туку поголеми долгови и фискален нестабилност“, вели Тренчевска

Пратеничката на СДСМ, Јована Тренчевска, на седницата на Комисијата за финансирање и буџет оцени дека предложениот ребаланс на Буџетот за 2026 година е потврда за, како што рече, погрешните економски проекции на Владата и води кон поголем буџетски дефицит, нови задолжувања и зголемен фискален ризик.

Според Тренчевска, расходите растат значително побрзо од приходите, а разликата ќе се покрива со нови кредити, што, како што истакна, ќе создаде дополнителен товар за јавните финансии и за граѓаните.

— реклама —

„Особено е забележливо што расходите се зголемуваат со значително побрзо темпо од приходите. Додека приходната страна се ревидира за околу 4,6 милијарди денари, расходите растат за 11,6 милијарди денари. Разликата помеѓу овие две категории ќе се покрие преку дополнително задолжување, што подразбира дека поголемиот дел од новата јавна потрошувачка нема да биде финансирана од тековните буџетски приходи“, рече Тренчевска.

— реклама —

Таа посочи дека Владата во ребалансот ги намалила проекциите за економски раст, а ја зголемила прогнозата за инфлацијата, но и покрај тоа предвидува повисок дефицит.

„Проекцијата за реален раст на БДП е ревидирана од 3,8 на 3,5 проценти, додека инфлацијата е зголемена на 4,5 проценти. Наместо внимателен и развоен буџет, добиваме поширок дефицит и поголем простор за тековна потрошувачка“, истакна Тренчевска.

— реклама —

Пратеничката додаде дека, според неа, Владата во изминатите две години го зголемила јавниот долг за околу 2,5 милијарди евра и продолжува да ја финансира јавната потрошувачка преку задолжување, наместо преку економски раст и инвестиции.

Таа нагласи дека одржлив економски развој може да се постигне само со инвестиции кои ја зголемуваат продуктивноста, а не со нови кредити.

„Имаме буџет без реформи, со повеќе долгови. Наместо стабилизација, се создава нов фискален ризик, што го потврдува и мислењето на Фискалниот совет, а Владата го поткопува сопствениот план за фискална консолидација“, изјави Тренчевска.