Речиси 500 мигранти вчера пристигнале во Обединетото Кралство со мали чамци преку Ла Манш, со што било прекинато десетдневното затишје во нерегуларните преминувања од Франција.
Вкупно 494 лица со седум чамци се истовариле во Довер и биле пренесени во базата на Командата за гранична безбедност. Малите гумени чамци продолжиле да пристигнуваат во британските води до доцна во вечерните часови.
Според анализа на владините податоци, која ја направила агенцијата „Прес асошиејшн“, бројот на пристигнувања оваа година сепак е помал во споредба со истиот период минатата година.
Од 1 јануари до 25 август годинава, вкупно 15.897 лица го преминале Ла Манш од Франција до Обединетото Кралство со мали чамци. Тоа е за 45 отсто помалку во споредба со истиот период во 2025 година.
Од 2020 година, преминувањето на Ла Манш со мали чамци стана најчестиот регистриран начин на нерегуларно влегување во Обединетото Кралство.
Речиси сите лица кои пристигнуваат со мали чамци поднесуваат барања за азил, а според меѓународното право можат да останат во земјата додека нивните барања се разгледуваат. Во периодот од јули 2025 до јуни 2026 година, пристигнувањата со мали чамци сочинувале 40 отсто од сите барања за азил.
Чамците кои пристигнале во Обединетото Кралство во периодот од 26 август 2025 до 25 август 2026 година превезувале во просек по 68 лица, што е двојно повеќе од просекот во 2021 година. Експертите предупредуваат дека пренатрупаноста на пловилата дополнително го зголемува ризикот при преминувањето.
Според податоците на Обединетите нации, во текот на 2024 година најмалку 84 лица загинале при обид да го преминат Ла Манш.
Британската влада најави засилена борба против мрежите за криумчарење мигранти кои ги организираат преминувањата. Државјаните на Еритреја сочинувале 18 отсто од сите лица кои пристигнале во периодот од јули 2025 до јуни 2026 година.
Податоците покажуваат и дека дел од луѓето влегуваат во Обединетото Кралство преку други нерегуларни патишта. Во периодот од јули 2025 до јуни 2026 година биле откриени 4.712 лица кои влегле во земјата без дозвола, скриени во возила, траекти или авиони. Тоа е за 17 отсто помалку од претходниот период.
Постојат и лица кои влегуваат легално со работна или студентска виза, но остануваат во земјата и по истекот на дозволата. Не е познат точниот број на луѓе кои во Обединетото Кралство престојуваат без важечка дозвола откако претходно легално влегле во земјата.
Со последните пристигнувања, бројот на луѓе кои годинава го преминале Ла Манш достигна 16.391. Тоа е за 43 отсто помалку од истиот период минатата година и за 17 отсто помалку од истиот период во 2024 година.
Министерката за внатрешни работи Шабана Махмуд оцени дека падот на бројот на пристигнувања не е причина за опуштање и порача дека „има уште работа“.
