Непал засега не планира да прифати странски спасувачки тимови по разорните поплави што погодија повеќе области во земјата, иако помош понудиле неколку држави чии граѓани се меѓу исчезнатите.
Поплавите особено го погодија округот Расува, во близина на границата со Кина, каде што се уништени населени места, оштетени се хидроелектрани, а бројот на загинати се приближува до 500. Стотици странски државјани и натаму се водат како исчезнати.
Од непалското Министерство за надворешни работи соопштија дека операциите за пребарување и спасување во моментов ги водат домашните безбедносни служби.
„Природно е другите да понудат помош. Нашите безбедносни агенции ги спроведуваат операциите за пребарување и спасување. Засега таква помош не ни е потребна“, изјави портпаролот на Министерството, Лок Бахадур Четри.
Според „Катманду пост“, Индија, Кина, САД, Велика Британија, Јапонија, Јужна Кореја, Шри Ланка и Бангладеш побарале дозвола нивни тимови да се приклучат во спасувачките операции.
Јужна Кореја веќе испратила тим за одговор во Непал и најавила дополнителна помош во случај на катастрофа. Сепак, од Сеул соопштиле дека Катманду засега не планира да прифати странски спасувачки екипи.
Јужнокорејските власти најавија дека ќе продолжат со разговорите со непалската влада. Сеул исто така вети еден милион долари хуманитарна помош преку меѓународни организации.
Меѓу исчезнатите има и девет јужнокорејски државјани кои работеле во хидроелектрана, додека уште десетмина биле привремено заглавени по катастрофата.
Поранешниот непалски амбасадор во Обединетите нации во Женева, Динеш Батараи, за Reuters изјавил дека воздржаноста на владата да прифати странски тимови можеби е поврзана со чувствителната локација на Расува, која граничи со кинески Тибет.
Според него, можно е властите да ја земале предвид геополитичката чувствителност на регионот.
Непалското Министерство за надворешни работи, сепак, ја отфрли таквата поврзаност и порача дека одлуката нема врска со односите со Кина, туку со фактот дека домашните спасувачки екипи засега ја водат операцијата.
Кинеските државни медиуми во меѓувреме објавија дека претседателот Си Џинпинг изразил сочувство до непалскиот претседател по катастрофата.
