Речиси 70 тони небезбедна храна уништени во Македонија за осум месеци

Речиси 70 тони небезбедна храна биле уништени во Македонија во првите осум месеци од 2026 година, а увозот на повеќе од 21 тон храна од неживотинско потекло бил забранет. Дополнително, во земјите на потекло биле вратени пратки со над 122 тони производи од животинско потекло.

— реклама —

Податоците ги соопшти директорот на Агенцијата за храна и ветеринарство (АХВ), Оливер Миланов, наведувајќи дека од јануари до август биле спроведени вкупно 74.838 инспекциски надзори во домашниот промет и при увозот на храна.

— реклама —

Во рамките на контролите биле уништени 69.776 килограми небезбедна храна, додека увозот на 21.105 килограми храна од неживотинско потекло бил забранет. Во земјите на потекло биле вратени и пратки со вкупна тежина од 122.602 килограми храна од животинско потекло.

Во истиот период, преку Одделението за заштита на потрошувачите биле поднесени повеќе од илјада иницијативи од физички и правни лица за спроведување инспекциски надзор. Најголем дел од нив се однесувале на здравствената заштита и благосостојбата на животните.

— реклама —

Миланов нагласи дека безбедноста на храната е клучна за заштита на здравјето на граѓаните и за довербата на потрошувачите. Тој посочи дека активностите на АХВ, покрај откривањето неправилности, вклучуваат и превенција, едукација и соработка со производителите, операторите со храна и другите надлежни институции.

Од Агенцијата порачуваат дека безбедноста на храната е заедничка одговорност и дека се неопходни доследни контроли, почитување на законските обврски и координација меѓу институциите за заштита на потрошувачите.