Речиси секое трето дете во Македонија расте во сиромаштија, ОН предупредуваат на глобалната станбена криза

Речиси секое трето дете во Македонија живее под прагот на сиромаштија, покажуваат официјалните статистички податоци, во време кога Обединетите нации предупредуваат на продлабочувањето на глобалната станбена криза. По повод 17 Октомври, Меѓународниот ден за искоренување на сиромаштијата, ОН годинава го ставаат во преден план правото на достоинствено и безбедно домување.

Според најновите глобални процени, 826 милиони луѓе годинава живеат во екстремна сиромаштија, со помалку од три долари дневно. Во Македонија, стапката на сиромаштија кај децата до 17 години изнесува 29,5 проценти, што укажува на сериозната изложеност на најмладите на неповолни социјални услови.

— реклама —

Во пораката по повод овој ден, генералниот секретар на ОН предупреди дека сиромаштијата не е само недостиг од приходи, туку и директно ускратување на основните човекови права. Глобалната рамка за периодот од 2026 до 2028 година е поставена под мотото „Обединети за мир и човекови права“, а годинашниот фокус е насочен кон обезбедување сигурен и безбеден дом за сите.

Податоците на меѓународната новинска агенција ИПС покажуваат дека 2,8 милијарди луѓе во светот живеат во несоодветни услови за домување. Повеќе од една милијарда се сместени во неформални населби и сиромашни квартови, додека над 300 милиони луѓе се целосно бездомни. Дополнително, 3,8 милијарди луѓе немаат пристап до никаква социјална заштита, поради што се особено ранливи при економски потреси.

— реклама —

Во Македонија, вкупната стапка на сиромаштија изнесува 21,9 проценти, според податоците на Државниот завод за статистика. Тоа значи дека повеќе од секој петти граѓанин живее под утврдениот праг на сиромаштија. Доколку од пресметката се исклучат пензиите и социјалните трансфери од државата, стапката би се зголемила на 39,4 проценти.

Особено загрижувачка е состојбата кај самохраните родители со издржувани деца, кај кои стапката на сиромаштија достигнува 45,8 проценти. Кај невработените лица таа изнесува 45,7 проценти. За споредба, кај вработените стапката е 7,9 проценти, а кај пензионерите 12 проценти. Податоците укажуваат дека социјалната ранливост е особено изразена кај семејствата што се соочуваат со невработеност и ограничени приходи.

— реклама —

Европската Унија применува поширок показател, кој го мери ризикот од сиромаштија или социјална исклученост. Според овој индикатор, погодени се 20,9 проценти од населението, односно 92,7 милиони европски граѓани.

Сиромаштијата не ги погодува само невработените. На глобално ниво, податоците на ОН покажуваат дека 284 милиони луѓе живеат во сиромаштија и покрај тоа што имаат работа. Феноменот на вработени кои не успеваат да обезбедат пристоен живот станува сè позначаен и во урбаните средини во Македонија, каде што растот на трошоците за храна, сметки и изнајмување станови го оптоварува семејниот буџет.

Организацијата „АТД Четврт свет“ предупредува дека сиромаштијата може да се пренесува од генерација на генерација доколку државите не преземат мерки за заштита на децата и подобрување на условите за домување.

Кога децата растат во семејства што не можат да им обезбедат основни услови за живот, пристапот до образование и здравствена заштита станува понеизвесен. Така, нееднаквоста ризикува да се претвори во трајна општествена состојба, наместо да остане проблем што може да се надмине со соодветна поддршка.