„Рибата зајак“ станува сериозна закана за Грција: Се организира прв голем натпревар во лов

Грција официјално ја започна првата голема акција за намалување на бројот на лагокефалосот, познат и како „риба зајак“, инвазивен и исклучително отровен вид кој претставува сериозна закана за морскиот екосистем, рибарството и туризмот.

— реклама —

Станува збор за прв голем натпревар во лов на оваа риба, во кој властите и рибарските здруженија ги повикаа да се вклучат и професионалните и рекреативните рибари. За најуспешните учесници се обезбедени парични и материјални награди.

Лагокефалосот, кој преку Суецкиот Канал пристигнал од Црвеното Море, во последните години стана сериозен проблем во Егејското и Јонското Море.

— реклама —

Рибарите предупредуваат дека оваа риба предизвикува големи штети бидејќи со своите исклучително силни заби лесно ги оштетува рибарските мрежи и опрема за да дојде до плен.

— реклама —

Дополнително, таа агресивно се храни со други морски организми, што доведува до значително намалување на популацијата на автохтоните видови риби и ракови и сериозно ја нарушува биолошката рамнотежа во морето.

Особено загрижува фактот што лагокефалосот содржи тетродотоксин – исклучително опасен отров кој може да биде смртоносен за луѓето доколку рибата се консумира. Експертите предупредуваат дека токсинот не се уништува ниту со термичка обработка.

— реклама —

„Оваа риба буквално го уништува нашиот екосистем и ја менува биолошката рамнотежа во морето. Доколку не се преземат мерки, последиците за грчкиот туризам и рибарството би можеле да бидат катастрофални“, предупредуваат морските биолози.