Јавните комунални претпријатија мора да инвестираат во инфраструктура, дигитализација и енергетска ефикасност доколку сакаат да ги намалат загубите на вода и да го подобрат своето работење, порача претседателот на Регулаторната комисија за енергетика, водни услуги и услуги за управување со комунален отпад (РКЕ), Ацо Ристов.
Говорејќи на панелот „Користење на водоводната мрежа“, во рамките на почетокот на проектот „Отпорни и ефикасни комунални претпријатија во Македонија“, Ристов истакна дека РКЕ ќе ги поддржи сите инвестиции што ќе придонесат за поголема ефикасност, но нивната реализација ќе биде внимателно следена.
„Ве охрабрувам да инвестирате. Но, реализацијата ќе ја следиме преку индикатори за ефикасност – дали се намалуваат загубите на вода и дали се подобрува наплатата. Анализите покажуваат дека со дигитализација трошоците можат да се намалат за 10 до 15 проценти“, изјави Ристов.
Тој додаде дека намалувањето на потрошувачката на електрична енергија значително ги намалува расходите на претпријатијата, а РКЕ работи на мерки за зголемување на енергетската независност на локално ниво. Идејата е општините да можат да формираат друштва за производство на електрична енергија, преку кои самостојно ќе управуваат со произведената енергија и ќе го продаваат евентуалниот вишок.
Проектот „Отпорни и ефикасни комунални претпријатија во Македонија“ е финансиран од Владата на Швајцарската Конфедерација, Министерството за животна средина и просторно планирање и дел од општините. Неговата цел е подобрување на оперативното и финансиското работење на јавните комунални претпријатија и зголемување на нивната енергетска ефикасност преку современи решенија за одржливо управување со водните ресурси.
