Нови цени на горивата: дизелот поевтинува за 4,5 денари, бензините поскапуваат за 1 денар

Регулаторната комисија за енергетика, водни услуги и услуги за управување со комунален отпад донесе одлука за нови малопродажни цени на нафтените деривати, кои во просек се намалуваат за 1,06 проценти во однос на претходната пресметка.

— реклама —

Најголемо поевтинување има кај дизелот. Од 29 септември во 00:01 часот, максималната малопродажна цена на ЕУРОДИЗЕЛ БС (Д-Е V) ќе изнесува 100 денари за литар, што е за 4,50 денари помалку од досегашната цена.

Од друга страна, бензините поскапуваат за еден денар. ЕУРОСУПЕР БС-95 ќе се продава по максимална цена од 100 денари за литар, додека ЕУРОСУПЕР БС-98 ќе чини 102 денари за литар.

— реклама —

Цената на екстра лесното масло за домаќинство се намалува за три денари и ќе изнесува 111,50 денари за литар. Мазутот М-1 НС поевтинува за 0,196 денари по килограм и неговата максимална цена ќе биде 49,882 денари за килограм.

— реклама —

Според РКЕ, во последната пресметка референтните цени на светскиот пазар кај бензините бележат зголемување од 0,049 проценти, додека кај дизелот има намалување од 6,734 проценти. Кај екстра лесното масло е регистрирано намалување од 4,936 проценти, а кај мазутот од 1,630 проценти.

Во пресметката е применета и владината одлука за намалена стапка на ДДВ од 10 проценти за ЕУРОДИЗЕЛ, како и намалена акциза од четири денари за литар кај бензините ЕУРОСУПЕР БС-95 и БС-98 и кај ЕУРОДИЗЕЛ.

РКЕ посочува дека утврдените цени се максимални, што значи дека трговците на големо и мало можат да ги продаваат нафтените деривати и по пониски цени.