Ролеркостер, панорамско тркало и нови атракции: Новиот Луна парк ќе биде готов до крајот на 2027 година, уверуваат од Град Скопје

Скопје треба да добие нов, современ Луна парк до крајот на 2027 година, а Градот уверува дека административните и договорните постапки нема да го одложат ветениот рок. Во наредниот месец треба да започне монтажата на седум реквизити набавени со претходен договор, паралелно со уредувањето на просторот.

Од Град Скопје посочуваат дека новиот Луна парк е замислен како забавен комплекс со содржини за различни возрасти. Покрај класичните забавни реквизити, предвидени се ролеркостер, панорамско тркало, водени атракции, интерактивни игри и зони за виртуелна реалност.

— реклама —

Во врска со постапките за набавка и спогодбеното раскинување на договорот склучен по новиот тендер, од Градот објаснуваат дека одлуката била донесена за да се избегне двојна набавка на исти реквизити и непотребно трошење на јавните средства.

Претходниот договор за набавка на реквизити бил склучен во времето на поранешниот градоначалник Коце Трајановски, а по неговото раскинување фирмата повела судска постапка против Град Скопје. Според соопштението, судската одлука во корист на фирмата, со која Градот бил обврзан да ги плати реквизитите, била донесена откако веќе бил склучен договорот по новиот тендер.

— реклама —

Бидејќи новата набавка опфаќала и реквизити предвидени со претходниот договор, било одлучено новиот договор да биде спогодбено раскинат. Од Градот велат дека на овој начин се избегнува дуплирање на опремата и дополнително оптоварување на буџетот.

— реклама —

Оваа одлука, според надлежните, нема да влијае врз рокот за изградба на Луна паркот. За еден месец треба да започне монтирањето на седумте реквизити од претходната набавка, заедно со уредувањето на просторот, со цел тој дел од паркот да биде подготвен за работа.

Дополнителните реквизити, меѓу кои ролеркостерот и панорамското тркало, ќе бидат набавени преку нов тендер што допрва треба да биде објавен. Со ова ќе се надополни понудата на забавни содржини, а вредноста на новиот договор, според најавите, ќе биде помала од 10 милиони евра.

Новиот Луна парк ќе зафаќа поголема површина од некогашниот, проширувајќи се и на просторот во Градскиот парк каде што се наоѓаа летните дискотеки, отстранети пред шест месеци. Поголемиот простор треба да овозможи поставување повеќе атракции, подобра организација на содржините и попријатен престој за посетителите.

Од Град Скопје истакнуваат дека целта е да се создаде современо место за забава и семејно дружење, кое ќе им понуди на најмладите простор за игра, нови пријателства и незаборавни доживувања.