Американскиот државен секретар Марко Рубио и рускиот министер за надворешни работи Сергеј Лавров денеска се сретнаа во Њујорк, на маргините на Генералното собрание на Обединетите нации. Средбата се одржа зад затворени врати, а меѓу темите биле војната во Украина и можностите за намалување на тензиите.
По разговорите, Рубио изјави дека двете страни покажале интерес за ограничено примирје, кое би опфатило испораки на жито и енергенси. Според него, таквата мерка не би значела крај на војната, но би можела да ги намали дел од глобалните последици од конфликтот.
Рубио оцени дека војната во Украина нема да биде решена на бојното поле, туку преку преговори и договор.
„Колку побрзо постигнеме договор, толку помалку ќе има разурнување и помалку луѓе ќе загинат на двете страни“, изјави американскиот државен секретар.
Тој додаде дека засега не се разговарало за нова средба меѓу американскиот претседател Доналд Трамп и рускиот претседател Владимир Путин. Според Рубио, за таков состанок е потребна дополнителна работа и подготовка.
Во меѓувреме, Рубио најави дека САД го поканиле Путин на самитот на Г20, кој во декември треба да се одржи во Мајами. Тој изрази надеж дека рускиот претседател ќе ја прифати поканата.
Средбата меѓу Рубио и Лавров се одржа еден ден откако Трамп разговараше со украинскиот претседател Володимир Зеленски во Њујорк. Зеленски по средбата изјави дека Украина е подготвена за „енергетско примирје“, под услов Русија да престане со нападите врз украинската енергетска инфраструктура.
Во пресрет на средбата, Кремљ соопшти дека сè уште нема услови за започнување мировни преговори, иако Москва останува отворена за разговори.
Рубио и Лавров последен пат се сретнаа пред два месеца, на маргините на состаноците поврзани со АСЕАН во Манила.
