Руската Федерална антимонополска служба (ФАС) покрена постапка против компанијата Apple, обвинувајќи ја дека на уредите со оперативен систем iOS не ги прединсталирала задолжителните руски апликации.
Од ФАС соопштија дека Apple не го испочитувал ниту претходното предупредување да ги отстрани, како што наведуваат, дискриминаторските услови што се однесуваат на руските интернет-прелистувачи и софтверски производи.
Постапката е поведена согласно со рускиот Закон за заштита на конкуренцијата, а од службата посочуваат дека нивната одлука се темели на претходни случаи против Apple, кои биле потврдени и од судовите.
Доколку се утврди дека компанијата ги прекршила законските прописи, би можела да се соочи со парична казна според рускиот Закон за административни прекршоци.
Во меѓувреме, Apple на 27 јули соопшти дека новата верзија на неговиот софтвер ќе овозможи прединсталирање на руски интернет-прелистувач.
Во последните години руските власти воведуваат сè построги правила за странските технолошки компании со цел да обезбедат поголема застапеност на домашните дигитални услуги на уредите и платформите што работат на рускиот пазар.
