Русија го обвини НАТО за ширење на влијанието надвор од сопствената територија

Рускиот министер за надворешни работи, Сергеј Лавров, го обвини НАТО дека се обидува да го прошири своето влијание далеку надвор од утврдената зона на одговорност и да ја наметне својата волја во други делови од светот. Според него, ваквите амбиции бараат соодветен одговор од земјите во Евроазија.

Лавров оцени дека НАТО нема никаква врска со Евроазија, иако Алијансата сега тврди дека целиот евроазиски простор спаѓа во нејзината зона на одговорност.

— реклама —

„Иако станува збор за одбранбен сојуз чија задача е да ги штити териториите на земјите членки, НАТО сега тврди дека заканите за териториите на Северноатлантската алијанса доаѓаат од Тајванскиот Теснец, Јужното Кинеско Море и други области. Тоа претставува значителен концептуален пресврт, кој ја открива намерата на НАТО да ја наметне својата волја далеку надвор од сопствената зона на одговорност“, изјави Лавров.

— реклама —

Тој ова го истакна на пленарната седница на конференцијата посветена на безбедноста во Централна Азија и Авганистан. Според рускиот министер, неопходен е конструктивен одговор на ваквите тенденции, кој можат да го дадат единствено земјите од регионот.

Лавров се повика и на иницијативата на рускиот претседател Владимир Путин за создавање „Големо евроазиско партнерство“.

— реклама —

Тој нагласи дека архитектурата на колективната безбедност на континентот треба да се изгради преку соработка меѓу сите земји во Евроазија, како и меѓу различните интеграциски структури што функционираат во регионот.

Според Лавров, државите што ги нарече „колективен Запад“ со години се обидуваат да создаваат жаришта на напнатост долж руските граници.

„Особено е позната нивната улога во вештачки предизвиканата украинска криза, која произлезе од незапирливото, повеќедецениско проширување на НАТО кон исток, во насока на руските граници, како и од нивната неодговорна поддршка за отворено неонацистичкиот и русофобичен режим во Киев, чија вистинска природа повторно се разоткрива пред очите на сите“, заклучи Лавров.