Русија ја блокира испораката на казахстанска нафта за Германија, Полска помогна

Германската рафинерија ПЦК обезбеди нафта од Јужна Америка преку Полска за да го одржи стабилното производство, откако беа прекинати испораките од Казахстан преку нафтоводот „Дружба“.

— реклама —

Рафинеријата во градот Шведт, која сè уште е во мнозинска сопственост на рускиот нафтен гигант „Росњефт“, има клучно значење за снабдувањето со гориво во Германија. Таа покрива околу 90 проценти од потребите на Берлин, а со нафтни деривати снабдува и делови од Полска.

— реклама —

Иако германската влада во 2022 година ја презеде управата врз германската подружница на „Росњефт“, компанијата формално останува мнозински сопственик на рафинеријата.

Русија, во меѓувреме, ги запре испораките на казахстанска нафта, повикувајќи се на технички причини, поради што Берлин бараше алтернативни извори за снабдување. Германската министерка за економија, Катарина Рајхе, неодамна изјави дека разговорите со Полска за обезбедување нови испораки се одвиваат успешно и оцени дека снабдувањето со нафта во Германија не е загрозено.

— реклама —

Полската компанија „Унимот Палива“ потврди дека започнала испораки на нафта за ПЦК, а според германските медиуми, за јули се планирани уште две пратки. За викендот, во пристаништето Гдањск пристигна танкер со нафта од Гвајана.

— реклама —

Од полската компанија истакнуваат дека сигурноста на снабдувањето не зависи само од земјата од која доаѓа нафтата, туку и од начинот на организирање на испораките, транспортната инфраструктура и деловниот модел преку кој се реализира целиот процес.