Русија нема намера да запре: Путин му порачал на Трамп дека ќе ги оствари сите цели

Рускиот претседател Владимир Путин во телефонски разговор со американскиот претседател Доналд Трамп ја отфрлил можноста за мировни преговори со Украина. Тој порачал дека Русија ќе продолжи да се бори сè додека не ги оствари „сите свои цели“, изјави помошникот на Путин, Јуриј Ушаков, пренесува „Правда“.

Ушаков за руските медиуми изјавил дека Трамп „срдечно му го честитал роденденот на Путин, неформално му посакал успех и благосостојба и ги пренел поздравите од првата дама“.

Путин му се заблагодарил на Трамп за вниманието што го посветува на дијалогот со Москва и истакнал дека рускиот став во врска со агресијата врз Украина останува непроменет.

Според Ушаков, Путин категорично ја отфрлил можноста за обновување на мировните преговори. Тој ја обвинил Украина дека се обидува да ги попречи руските избори и се обидел да го убеди Трамп дека украинскиот отпор „нема никаква перспектива“.

— реклама —

Путин додал дека руските сили „целосно ја држат иницијативата во свои раце и напредуваат“.

Ушаков тврди дека Трамп по разговорот дал инструкција пораките што ги добил од Русија да ѝ бидат пренесени на украинската страна.

Тој навел дека двајцата лидери изразиле задоволство од функционирањето на комуникациските канали, особено на оние во кои се вклучени разузнавачките служби.

— реклама —

Разговарале и за можноста за средба на маргините на самитот на Азиско-пацифичката економска соработка (АПЕК), доколку и двајцата присуствуваат.

Според Ушаков, разговорот траел час и половина, а за време на повикот „никој не сакал прв да ја прекине врската“.

Трамп во четвртокот вечерта изјави дека телефонски разговарал со Путин и дека се договориле за испорака на милиони тони руски дизел на американскиот и светскиот пазар.

Украинскиот претседател Володимир Зеленски остро ги критикуваше постапките на Трамп. Тој го опиша ублажувањето на санкциите како „апсолутно ужасен“ потег и нагласи дека овој „роденденски подарок за Путин“ ќе ѝ обезбеди на Русија нови милијарди за продолжување на војната.

— реклама —

Американски, украински и европски преговарачи вчера одржаа шестчасовни разговори во Мајами со цел да постигнат договор за единствен предлог за завршување на војната во Украина, изјави извор запознаен со разговорите.

Целта е во наредните недели да се постигне договор за предлог што би ѝ бил претставен на Русија, како и да се направи обид за напредок во преговорите пред зимата, навел изворот, кој зборувал под услов да остане анонимен.

На разговорите учествувале американските претставници Стив Виткоф и Џаред Кушнер, украинска делегација и претставници на Европа и НАТО.

За време на средбите бил разгледан широк спектар прашања, меѓу кои и пакет мерки за Украина по завршувањето на војната. Тој би опфаќал безбедносни гаранции од САД и Европа, изјавил изворот.

Се разговарало и за економски план за Украина по војната, како и за патот на Киев кон членство во Европската Унија.

Во врска со чувствителното прашање за териториите, делегациите разговарале за „одредени идеи“, но изворот одбил да открие повеќе детали.

Според истиот извор, делегациите разговарале и за безбедносното уредување на односите меѓу Европа и Русија, кое треба да постави темели за мир во годините што следуваат. Не беа соопштени дополнителни детали.