Украинскиот државен енергетски гигант „Нафтогас“ соопшти дека норвешките власти, по негово барање, заплениле руски брод како дел од постапката за наплата на милијарди долари што Русија ѝ ги должи на компанијата.
„Нафтогас“ од 2016 година води правна постапка против Русија за надомест на штетата поради одземањето на неговиот имот на Крим, по руската анексија на полуостровот во 2014 година.
Арбитражен трибунал во Хаг во април 2023 година ѝ наложи на Русија да му исплати на „Нафтогас“ 4,22 милијарди долари, односно околу 3,59 милијарди евра, плус камати и судски трошоци. Москва досега не ја извршила исплатата.
Според „Нафтогас“, заплената на рускиот брод на 31 август ја наредил Окружниот суд Норд-Тромс и Сења во Норвешка.
Станува збор за бродот „Професор Молчанов“, кој е во руска сопственост и се користи за комерцијални експедициски крстарења, вклучително и патувања до норвешкиот архипелаг Свалбард.
„Русија не може да ја избегне одговорноста едноставно со одбивање да ја почитува меѓународната арбитражна одлука“, изјави вршителот на должноста извршен директор на „Нафтогас“, Сергеј Федоренко.
Според судската наредба, бродот не смее да ја напушти сегашната локација, а гувернерот на Свалбард треба да ги преземе потребните мерки за да спречи негово поместување.
„Нафтогас“ соопшти и дека ги координира мерките за присилна наплата во повеќе земји, меѓу кои САД, Франција, Велика Британија и Финска, каде што е замрзнат руски имот.
Москва, пак, поднела жалба во постапката, тврдејќи дека не добила известување за судскиот процес.
