Руски балистички проектил на 24 јули погодил фабрика за производство на дронови во Киев, која е во сопственост на американската компанија „Терминал Аутономи“ (Terminal Autonomy), регистрирана во американската сојузна држава Делавер, објави британскиот весник „Гардијан“.
Според медиумот, ова би можел да биде првиот случај од почетокот на војната Русија директно да нападне објект што е во сопственост на американска компанија.
Компанијата произведува прецизни дронови со долг дострел, опремени со навигациски системи отпорни на електронско попречување. Во завршната фаза од летот, управувањето го презема систем базиран на вештачка интелигенција, што овозможува нападот да продолжи и при прекин на комуникациите.
„Терминал Аутономи“ е регистрирана во 2023 година во Делавер. Компанијата не одговорила на барањето на „Гардијан“ за коментар, а без одговор останало и украинското Министерство за одбрана.
Поранешниот висок американски разузнавачки функционер Ентони Винчи изјави дека за Русија сопственоста на фабриката не е пресудна.
„За Русите не е важно кој е сопственик на производствениот погон. Доколку таму се произведува воена опрема, тој претставува легитимна цел“, изјави Винчи.
Тој оцени дека и евентуални украински погони за производство на американски системи, како што се ракетите „Патриот“, би биле потенцијална цел на руски напади.
Руската државна агенција ТАСС прва извести за нападот, повикувајќи се на руското Министерство за одбрана. Во соопштението не било наведено дека фабриката е во американска сопственост, но било посочено дека во неа работеле „експерти од украинско-американска компанија“.
Според ТАСС, во погонот се произведувале дроновите AQ-400 Scythe и AQ-100 Bayonet. Извор запознаен со работењето на компанијата за „Гардијан“ изјавил дека во нападот нема загинати.
