Руските власти во неколку сибирски региони ги повикаа компаниите, каде што е можно, да организираат работа од дома и да ја намалат потрошувачката на енергија поради сè посериозната криза со снабдувањето со гориво.
Според локалните медиуми, мерките се воведуваат откако недостигот на гориво зафатил речиси цела Русија, а ситуацијата дополнително се влошила по украинскиот напад со беспилотни летала врз една од најголемите руски рафинерии, објави „Политико“.
Во регионот Томск, заменик-губернерката Олга Крилова изјавила дека на институциите им е препорачано повнимателно да ги планираат службените патувања и почесто да користат онлајн-состаноци наместо физички средби.
Во соседниот Новосибирск, локалните власти им препорачале на компаниите да им овозможат работа од далечина на сите вработени чие присуство не е неопходно на работното место. Истовремено, граѓаните се повикани да ја ограничат употребата на приватните автомобили и да патуваат само кога тоа е неопходно.
Томск и Новосибирск граничат со регионот Омск, каде што се наоѓа една од најголемите руски рафинерии за нафта. Објектот претрпе значителни оштетувања во нападот со украински беспилотни летала на 6 јули, што, според медиумските извештаи, дополнително ја влошило состојбата со снабдувањето со гориво.
Според локални новинари, кризата се проширила во речиси сите делови на Русија. Во дел од регионите веќе се воведени ограничувања при продажбата на гориво, а возачите, зависно од местото, чекаат и до 12 часа во редици за да наполнат гориво.
