Руската економија покажува знаци на закрепнување и повторно влегува во фаза на раст, изјави рускиот министер за економски развој Максим Решетников, кој како фактори ги посочи усогласените мерки на Владата и Централната банка на Русија.
Според него, растот на бруто-домашниот производ повеќе не се потпира само на буџетската потрошувачка, туку е поддржан и од закрепнувањето на потрошувачката на граѓаните.
Решетников наведе дека приватната потрошувачка повторно расте, делумно благодарение на средствата што граѓаните и компаниите ги акумулирале во изминатите години. Тој истакна и дека Централната банка со постепеното намалување на референтната каматна стапка помогнала да се намалат инфлаторните притисоци и да се создадат поповолни услови за економски раст.
Според податоците на руското Министерство за економски развој, годишната стапка на инфлација на 10 август изнесувала 6,05 проценти, што е благо зголемување во однос на претходната недела, кога изнесувала 6,02 проценти.
Во исто време, прелиминарната проценка на рускиот завод за статистика покажала дека рускиот БДП во вториот квартал од 2026 година пораснал за 1,3 проценти на годишно ниво, по падот од 0,2 проценти во првиот квартал.
Резултатот бил подобар од очекувањата на Централната банка и Министерството за економски развој, кои за вториот квартал прогнозирале раст од 0,8 до 0,9 проценти.
