Руската влада го одобри нацрт-договорот со Србија за соработка во истражувањето и користењето на вселената за мирољубиви цели, објавено е денеска на официјалната веб-страница на Сојузното собрание на Русија.
Документот предвидува соработка меѓу двете земји во различни области поврзани со вселената, вклучително и истражување на вселената, вселенска медицина, далечинско набљудување на Земјата, сателитски системи, вселенска метеорологија и други области, пренесува РИА Новости.
Двете страни планираат да создадат неопходни услови за лансирање и функционирање на вселенски летала, спроведување заеднички научни проекти, како и за размена на технологии, знаења и материјални ресурси.
Договорот се склучува за период од 10 години, со можност за автоматско продолжување за периоди од по пет години. Како што се наведува, за надлежен изведувач од руска страна е определена државната корпорација „Роскосмос“.
Како што пренесува официјалниот весник на Сојузното собрание на Руската Федерација, „Парламентарна газета“, Москва и Белград во април потпишале програма за економска соработка за периодот од 2026 до 2031 година.
