Руски дизел ќе пристигне во САД за 15 до 20 дена по потпишувањето на договорите

Рускиот дизел би можел да пристигне на американскиот пазар во рок од 15 до 20 дена по потпишувањето на договорите, изјави рускиот вицепремиер Александар Новак. Тој посочи дека испораките до географски поблиските земји ќе се реализираат за пократко време.

Во изјава за агенцијата „Вести“, Новак рече дека во тек се преговори за комерцијалните услови и дека договорите се во завршна фаза. Испораките ќе започнат откако документите ќе бидат потпишани.

— реклама —

Според него, рускиот претседател Владимир Путин и американскиот претседател Доналд Трамп на 9 октомври, во телефонски разговор, постигнале договор за испорака на руски дизел на светскиот пазар.

Новак предупреди и на можен недостиг на гас во Европа, оценувајќи дека тој тешко може да се надомести поради затворањето на Ормускиот Теснец и прекинот на работата на постројката во Катар по нападите во март.

— реклама —

„Уверени сме дека во моментов не постои начин да се надомести недостигот. Според мене, европските политичари си пукаат во нога доколку забранат испораки, вклучително и оние од Русија“, изјави Новак, додавајќи дека последиците од таквите одлуки ќе ги почувствуваат потрошувачите во Европската Унија.

Тој наведе дека Русија учествува со 17 до 20 отсто во увозот на течен природен гас во ЕУ, пренесе РИА Новости.

— реклама —

Советот на Европската Унија во јануари усвои уредба за постепено укинување на увозот на руски течен природен гас и гас што се испорачува преку гасоводи. Забраната за увоз на течен природен гас врз основа на краткорочни договори стапи во сила на 25 април 2026 година, додека за долгорочните договори треба да почне да важи од 1 јануари 2027 година.

Новак потврди дека руските испораки на течен природен гас за европските пазари ќе продолжат до 1 јануари следната година, при што станува збор за значителни количества.

Тој објасни дека Русија месечно троши од 3,5 до 4 милиони тони дизел-гориво, а располага со речиси исто толкав вишок за извоз. Според него, Русија месечно испорачува дополнителни 3,5 милиони тони на светскиот пазар.

Новак додаде дека извозот е неопходен за да се избегне намалување на преработката во руските постројки поради недостиг од простор за складирање на вишокот гориво. Постигнатите договори меѓу претседателите, како што наведе, овозможуваат дополнителни количества дизел да се испорачуваат и во САД.