Руски државјанин осомничен за тројното убиство на стрелиштето „Чешка зброевка“ кај Даниловград извршил самоубиство откако полицијата го лоцирала и го опколила во шумата над Херцег Нови, објавија црногорските медиуми.
Михаил Шабуњин (30) бил пронајден во шумата над населбата Топла околу 3:35 часот. Според директорот на Полициската управа, Лазар Шќепановиќ, при обидот за апсење тој отворил оган кон полицајците, а потоа се застрелал во главата.
За тројното убиство Владата на Црна Гора прогласи два дена жалост – 1 и 2 септември.
Шабуњин е осомничен дека во понеделникот околу 16:45 часот со огнено оружје ги убил Петар Глобаревиќ (24) од Подгорица, Момир Радоњиќ (67) од Даниловград и Немања Капор (20) од Подгорица, кои биле вработени на стрелиштето.
По нападот, тој го украл автомобилот на еден од убиените и избегал кон подгоричката населба Рогами. Оттаму, според досегашните информации, продолжил кон Херцег Нови со такси, каде што подоцна бил лоциран од полицијата.
