Руски напад го оштети латвискиот конзулат во Украина, загинаа шест цивили

Во рускиот напад врз украинскиот град Славјанск беше оштетен почесниот конзулат на Латвија, а според украинските власти загинаа шест цивили, додека десетици лица се повредени.

— реклама —

Латвиската министерка за надворешни работи Баиба Браже соопшти дека во нападот е оштетена зградата на почесниот конзулат и ги информирала министрите од ЕУ и НАТО, како и меѓународните организации, за инцидентот.

„Русија може да уништи згради, но не и украинската волја и латвиската поддршка“, порача Браже. Според латвиските медиуми, почесниот конзул Олександр Павенко не е повреден.

— реклама —

Претседателот на Латвија, Едгарс Ринкевичс, нападот го оцени како воено злосторство и порача дека Латвија ќе продолжи да ја поддржува Украина и работата на својот почесен конзул.

— реклама —

Украинскиот претседател Володимир Зеленски соопшти дека во нападот, извршен со наведувани воздушни бомби, загинале шест цивили, а оштетени се станбени објекти, зградата на конзулатот и повеќе возила. Тој повторно побара од сојузниците побрза испорака на пресретнувачи за системите „Патриот“, нагласувајќи дека тие се клучни за заштита на цивилите.

По нападот, Министерството за надворешни работи на Латвија го повика рускиот вршител на должноста амбасадор и му врачи протестна нота, во која најостро го осуди нападот врз Славјанск и уништувањето на зградата на латвискиот почесен конзулат. Министерството соопшти и дека двајца вработени во конзулатот се повредени.

Нападот предизвика осуди и од европските лидери. Претседателката на Европската комисија Урсула фон дер Лајен изрази сочувство до семејствата на жртвите и оцени дека нападот покажува целосно непочитување на дипломатијата од страна на Русија. Претседателот на Европскиот совет Антонио Кошта, како и министрите за надворешни работи на Литванија и Естонија, исто така го осудија нападот и порачаа дека поддршката за Украина ќе продолжи.