Руски напад врз болница во Харков: Повредени најмалку 46 лица, се евакуираат 200 пациенти

Најмалку 46 лица се повредени во руски напад врз болница во украинскиот град Харков, а започната е евакуација на околу 200 пациенти, соопшти градоначалникот Игор Терехов.

Во нападот, извршен врз здравствена установа во областа Немишљански, биле оштетени повеќе од 1.000 прозорци во болницата и околните згради.

— реклама —

Руските напади продолжиле и во други делови на Украина. Воздухопловните сили издале предупредувања за балистички ракетни напади врз Киев и неколку други области. Во Днепропетровската област била погодена критична инфраструктура, соопшти началникот на локалната воена управа, Олександар Ганжа.

— реклама —

Поради нападите, Полска ги ставила своите воздухопловни сили во состојба на готовност. Во меѓувреме, градоначалникот на Москва, Сергеј Собјанин, соопштил дека околу 100 украински дронови биле неутрализирани додека се движеле кон рускиот главен град.

Во понеделникот, во руски воздушен напад врз училиште во Комишуваха, во Запорошката област на југоистокот на Украина, загинале најмалку 26 лица. Во објектот се делела хуманитарна помош, а бил користен и како засолниште.

— реклама —

Украинскиот претседател Володимир Зеленски оцени дека нападите ги уништуваат надежите за напредок кон мирот. Во интервју за американската телевизија Пи-Би-Ес, тој ги повика САД да извршат посилен притисок врз рускиот претседател Владимир Путин, наместо врз Украина. Зеленски предупреди дека зајакнувањето на Русија може да ја загрози безбедноста на цела Европа, вклучително и на земјите членки на НАТО.

— реклама —

Тој зборуваше и за последиците од војната врз украинските деца, посочувајќи дека тие биле принудени прерано да пораснат и да се соочат со суровата реалност на војната.

Во меѓувреме, американската администрација најави дека работни разговори меѓу Русија и Украина ќе се одржат на 10 и 11 ноември во Абу Даби, со посредство на САД. Последната средба од ваков вид се одржа во февруари во Женева, но не донесе конкретни резултати.