Рускиот дизел не стигнува до САД: Танкерите се пренасочуваат поради санкциите

Планот на американскиот претседател Доналд Трамп за увоз на руски дизел во САД се соочува со сериозни пречки, откако два танкера што првично пловеле кон американскиот брег ги пренасочиле своите маршрути. За случајот пишува „Фајненшл тајмс“, посочувајќи дека неизвесноста околу санкциите и законските ограничувања ги одвраќа американските купувачи.

Ова се случува во период кога залихите на дизел во САД паднале под 100 милиони барели, првпат по повеќе од 20 години. Во меѓувреме, цените на горивото растат, а дизелот е од клучно значење за американската економија.

— реклама —

Според пишувањето на весникот, Трамп претходно постигнал договор со рускиот претседател Владимир Путин за увоз на руски дизел, со цел да се намалат цените на горивата пред среднорочните избори.

Два од танкерите што требало да пристигнат во САД веќе го сменија курсот. Рускиот брод „Талисман“, кој е под санкции на САД, Велика Британија и ЕУ, се повлекол од Атлантскиот Океан и се наоѓа во близина на Алжир. Танкерот „Леруо“, кој плови под знамето на Сиера Леоне, ја сменил дестинацијата и сега се упатува кон Бразил.

— реклама —

Друг танкер, „Агиои Фанедес“, во грчка сопственост, сè уште се движи кон САД, но испраќа сигнал дека чека инструкции, бидејќи нема потврдено пристаниште за истовар. Кон американскиот брег плови и бродот „Ѕверот“, кој натоварил руски дизел во пристаништето Приморск на 27 октомври.

— реклама —

Планот предизвика реакции и во американската политика. Гувернерката на Њу Џерси, Мики Шерил, испрати предупредување до операторите на пристаништата и терминалите дека танкерите со руски дизел треба да бидат вратени; во спротивно, може да следуваат строги казни. Против договорот се изјасниле и демократските, но и дел од републиканските претставници во Конгресот, кои ја довеле во прашање неговата законитост.

Аналитичарот Мет Смит од „Кплер“ оценува дека две од трите пратки веќе се пренасочени, додека неизвесно е дали и третиот танкер ќе продолжи кон САД.

— реклама —

Во меѓувреме, глобалните залихи на дизел се намалуваат поради падот на рафинериските капацитети поврзан со војните во Иран и Украина. Според објавените податоци, фјучерсите на дизелот пораснале за повеќе од 60 отсто од почетокот на војната со Иран, додека цената на американските бензински пумпи достигнала околу 6,27 долари за галон.