Рускиот гас би можел да се врати во Европа додека трае војната во Украина

Можноста американски инвеститор да стане дел од сопственичката структура на гасоводот Северен тек била тема на разговори меѓу високи руски и американски претставници, меѓу кои и специјалниот пратеник на САД, Џаред Кушнер. Пет извори запознаени со ситуацијата потврдиле дека станува збор за гасоводот преку кој Германија пред руската инвазија на Украина добиваше руски природен гас.

Во разговорите учествувале Кирил Дмитриев, близок советник на рускиот претседател Владимир Путин, и Кушнер, зет на американскиот претседател Доналд Трамп. Кушнер, кој посредува во обидите за постигнување примирје меѓу Русија и Украина, смета дека економските договори можат да имаат улога во воспоставувањето мир. Според идејата што се разгледува, американските инвеститори би можеле да остварат приход од испораката на енергенси во Европа по завршувањето на војната.

Дмитриев и Кушнер во изминатите недели се сретнале во Москва и Њујорк. Два извора потврдиле дека прашањето за Северен тек и понатаму е присутно во разговорите, иако не е јасно во колкава мера било разгледувано за време на нивните средби.

— реклама —

Од Белата куќа порачаа дека за какви било договори Русија ќе мора да преговара со Американската развојна финансиска корпорација и Министерството за финансии, при што тие треба да бидат во корист на американските даночни обврзници и компании. Оттаму, сепак, наведоа дека во последно време немало разговори за Северен тек.

Дмитриев се залага за продолжување на испораката на руски гас за Германија. Минатиот месец тој разговарал со претставници на американските министерства за енергетика и финансии за можни енергетски иницијативи меѓу двете земји.

— реклама —

И понатаму не е јасно колкав е интересот на Вашингтон за повторно воспоставување на испораките на руски гас кон Германија. Според еден американски претставник, поради бројните пречки, таков договор во среднорочен период е малку веројатен.

Гасоводите Северен тек се под санкции на САД и Европската Унија, поради што нивното повторно активирање би се соочило со сериозни правни и политички пречки. Германија, пак, не планира да даде одобрение за повторно отворање на гасоводот и наведува дека обезбедила алтернативни извори на енергија.

Пред руската инвазија на Украина во февруари 2022 година, Германија повеќе од половина од потребите за гас ги покривала со увоз од Русија преку двата крака на Северен тек. Гасоводите престанаа да работат откако Москва го ограничи снабдувањето со гас кон Европа, а во септември 2022 година беа оштетени во серија подводни експлозии.

— реклама —

Разговорите меѓу Москва и Вашингтон се одвиваат во услови на голема недоверба во Европа кон руските намери. Во Германија има силно противење на повторното отворање на Северен тек, додека Алтернатива за Германија го поддржува таквиот потег. Полска и балтичките земји, исто така, се противат на обновување на енергетските врски со Русија.

Сопственичката структура претставува дополнителна пречка. „Газпром“ поседува 51 отсто од компанијата, две германски компании имаат вкупно 31 отсто, а преостанатиот удел е во сопственост на француска и холандска компанија. Според еден од изворите, германските акционери сакаат да ги задржат своите удели за да го зачуваат германското влијание доколку „Газпром“ го продаде својот дел.

— реклама —

Во разговорите меѓу Кушнер и Дмитриев, според два извора, била опфатена и можноста за продажба на имотот на руската енергетска компанија „Лукоил“, вклучително и рафинерии и бензински станици во Европа и други делови од светот.

Според планот што се разгледува, конзорциум составен од Американската развојна финансиска корпорација и инвеститори од Катар и Обединетите Арапски Емирати би го купил имотот, додека американските власти би ги укинале санкциите.

Од Белата куќа наведоа дека Стив Виткоф и Џаред Кушнер соработувале со Американската развојна финансиска корпорација за да се договори значителна авансна уплата и удел во добивката за САД.