САД привремено ги суспендираа санкциите кон Сирија, воведени според Законот „Цезар“, за период од 180 дена, соопшти американското Министерство за финансии по средбата меѓу претседателот Доналд Трамп и сирискиот лидер Ахмед ал Шара во Белата куќа. Во соопштението се наведува дека дел од рестрикциите остануваат во сила, особено оние што се однесуваат на трансакции поврзани со Русија и Иран.
Истовремено, Сирија ќе се приклучи на меѓународната коалиција против Исламска држава (ИСИС) предводена од САД, потврди сирискиот министер за информации Хамза ал-Мустафа. Со тоа, Сирија станува 90-та членка на коалицијата што има за цел елиминирање на последните упоришта на ИСИС и запирање на приливот на странски борци.
Министерот ал-Мустафа изјави дека потпишаниот документ се однесува на политичка соработка со коалицијата и не содржи воени компоненти.
Законот „Цезар“, донесен во 2020 година, беше насочен против режимот на Башар ал Асад и сите што соработуваат со него, особено во секторите на енергетика, градежништво и финансии. Новата одлука на Вашингтон го заменува претходниот шестмесечен прекин на санкциите воведен во мај.
