САД и Иран чекор поблиску до договор: цените на нафтата нагло паѓаат

САД и Иран, според информации на дел од американските медиуми, значително ги приближиле ставовите околу постигнување краток меморандум кој би можел да претставува основа за завршување на актуелните тензии. Извори запознаени со преговорите наведуваат дека преку регионални посредници, вклучително и пакистански канали, Вашингтон добил сигнали за напредок и подготвеност за компромис од иранска страна, иако засега нема официјална потврда за ваквите тврдења.

— реклама —

Американскиот претседател Доналд Трамп изјавил дека во последните 24 часа се воделе „многу добри разговори“ со Иран, нагласувајќи дека процесот се движи во позитивна насока, но и дека остануваат отворени клучни прашања. Тој посочил дека Вашингтон се обидува да го поедностави преговарачкиот процес, со цел умерените политички сили во Иран повторно да се вратат на масата, додека посложените теми би се решавале во следна фаза. Во исто време, Трамп предупредил дека доколку не се постигне договор, ќе следат „посериозни чекори“.

Планот што се разгледува предвидува прогласување крај на актуелната воена ескалација и отворање 30-дневен период на преговори за чувствителни прашања, меѓу кои нуклеарната програма на Иран, одмрзнувањето на иранските финансиски средства и безбедноста во Ормутскиот Теснец. Според најавите, Техеран денеска треба да достави одговор преку посредниците, додека официјално иранските власти соопштуваат дека предлогот сè уште се анализира.

— реклама —

Пазарите веднаш реагираа на сигналите за можно приближување на ставовите. Цената на нафтата продолжи да опаѓа, при што глобалниот репер Брент забележа пад од околу 1,5 проценти, на ниво од околу 99,8 долари за барел, по вчерашниот силен пад од речиси 8 проценти. Сличен тренд се забележува и кај американската сурова нафта, која се движи околу 93,5 долари за барел. И покрај овие падови, цените сè уште остануваат значително повисоки во споредба со периодот пред последните геополитички тензии.

— реклама —

Нафтените пазари во текот на неделата бележат силни осцилации, при што Брент во понеделник достигна највисоко ниво оваа година, пред наглиот пад во наредните денови. Аналитичарите посочуваат дека нестабилноста е директно поврзана со очекувањата за исходот од преговорите меѓу САД и Иран.

Во ваква средина, дел од големите енергетски компании бележат зголемени приходи. Британската нафтена компанија Шел соопшти дека во првото тримесечје од годината остварила добивка од 6,9 милијарди долари, што претставува значителен раст во однос на истиот период лани. Исто така, профитот од рафинериското работење изнесувал околу 2 милијарди долари.

— реклама —

Сличен тренд претходно пријави и Бритиш Петролеум, која објави значително зголемување на кварталниот профит. Според анализите, турбуленциите на енергетските пазари, иако носат ризици за глобалната економија, истовремено создаваат и значајни добивки за дел од големите нафтени компании.