По неколкумесечна криза и размена на воени удари, САД и Иран се доближуваат до договор што би можел да го отвори патот кон смирување на тензиите и нормализација на односите меѓу двете земји.
Според информациите на „Блумберг“, повикувајќи се на високи дипломатски извори, иранските претставници испратиле сигнали дека договорот е сè поизвесен, а првиот чекор би можел да биде потпишување меморандум за разбирање веќе следната недела, за време на самитот на Г7.
Како можна локација за церемонијата се споменува Женева, каде што, според извештаите на Си-Ен-Ен, би можеле да присуствуваат високи американски и ирански претставници, меѓу кои и американскиот потпретседател Џеј Ди Венс.
Американскиот претседател Доналд Трамп дополнително ги поттикна шпекулациите откако изјави дека се наѕира „големо решение“ кое би можело да стави крај на конфликтот со Иран. Тој посочи дека финализирањето на договорот го очекува во наредните денови.
Дипломатски извори појаснуваат дека меморандумот нема да претставува конечен мировен договор, туку рамка за продолжување на преговорите и спроведување на договорените мерки. Со неговото потпишување би започнала таканаречената „втора фаза“ од дипломатскиот процес, во која би се разработувале конкретни чекори кон трајна нормализација на односите.
Во разговорите, според медиумските извештаи, се опфатени и прашања поврзани со Либан, Хезболах и безбедноста на пловидбата низ Ормускиот Теснец.
И покрај оптимизмот што доаѓа од Вашингтон, Техеран сè уште нема официјално потврдено дека договорот е постигнат, па конечната разврска се очекува во текот на следните денови.
