Соединетите Американски Држави извршија нов бран воздушни напади врз ирански воени цели, со цел дополнително да ја ослабат способноста на Техеран да изведува напади врз бродови во Ормускиот теснец, соопшти Централната команда на САД (ЦЕНТКОМ).
Според американската војска, нападите биле насочени кон воени командни центри, поморски капацитети, позиции за лансирање ракети и беспилотни летала, како и системи за противвоздушна одбрана. Од ЦЕНТКОМ наведуваат дека и покрај конфликтот, комерцијалниот бродски сообраќај низ Ормускиот теснец продолжил да се одвива.
Нападите се извршени десетта ноќ по ред од почетокот на американската воена операција, откако американскиот претседател Доналд Трамп најави одмазда по смртта на тројца американски војници – двајца во Јордан и еден во Ирак.
„Секој пат кога Иран ќе убие американски војник, ќе плати многукратно за тоа убиство“, напиша Трамп на својата социјална мрежа Truth Social, додавајќи дека таквата наредба им ја пренел на секретарот за одбрана Пит Хегсет и на американските воени команданти.
Од иранска страна, државната новинска агенција ИРНА објави дека како одговор биле нападнати два нафтени танкери во Ормускиот теснец, како и американски воени објекти во Бахреин и Кувајт.
Иранскиот претседател Масуд Пезешкијан изјави дека неговата земја сега води „целосна војна“ со САД.
Во меѓувреме, Исламската револуционерна гарда соопшти дека извршила напад врз инфраструктурата на американската компанија „Амазон“ во Бахреин, при што, според иранските државни медиуми, бил погоден и уништен централен објект за обработка на податоци.
И покрај продолжувањето на воените дејствија и неуспехот на прекинот на огнот, Техеран соопшти дека дипломатската комуникација меѓу двете страни продолжува преку посредници.
