САД извршија нови напади врз ирански воени цели кај Ормускиот Теснец

Американската војска изврши нови напади врз ирански воени цели во близина на Ормускиот Теснец, јавуваат американски и ирански медиуми.

— реклама —

Според новинарот на „Аксиос“, Барак Равид, повикувајќи се на американски претставник, цел на нападите биле ракетни и противвоздушни системи, како и помали пловила што ѝ припаѓаат на Иранската револуционерна гарда.

— реклама —

Нападите биле изведени на повеќе локации долж стратешкиот поморски премин, околу еден час пред информацијата да биде објавена.

Иранските медиуми јавија за нови експлозии на јужниот брег на земјата, во близина на Ормускиот Теснец. Според агенцијата „Тасним“, детонации биле регистрирани во пристанишниот град Бандар Абас и во близина на островот Кешм во Персискиот Залив.

— реклама —

Државната агенција ИРНА објави дека станува збор за „непријателски напади“ и наведе дека експлозиите биле слушнати во повеќе делови на Бандар Абас, каде што се наоѓаат воени објекти.

Во меѓувреме, провладината агенција „Мехр“ соопшти дека во Кешм загинал директорот на телекомуникациите на покраината Хормозган, додека уште две лица се повредени. Засега не е познато кога точно настрадал, а според медиумите, тој бил испратен на островот за поправка на телекомуникациската инфраструктура.