САД ќе обезбедат до 7 милијарди долари за енергетика, рударство и инфраструктура во Аргентина

САД најавија кредитна поддршка до 7 милијарди долари за проекти во Аргентина, со фокус на енергетиката, рударството и инфраструктурата. Средствата ќе бидат достапни до 2027 година преку Американската извозно-увозна банка.

Според американскиот Стејт департмент, кредитите ќе им овозможат на компаниите да набавуваат опрема од САД и да ангажираат американски компании за реализација на инфраструктурни проекти. Меѓу планираните активности се проширување на железничката мрежа, изградба и унапредување на цевководи, пристаништа и електроенергетски системи.

— реклама —

Дел од соработката е насочен кон подобро поврзување на северозападниот дел на Аргентина, каде што се наоѓаат значајни наоѓалишта на литиум и бакар, со пристаништата во земјата. Целта е да се олесни транспортот на минерали, нафта и гас кон САД и други пазари.

Од Вашингтон наведуваат дека договорот треба да придонесе за зајакнување на економските односи меѓу двете земји и зголемување на американските инвестиции во Аргентина. Соработката истовремено се поврзува со напорите на САД да ја намалат зависноста од кинеската индустрија за преработка на минерали.

— реклама —

Аргентинскиот претседател Хавиер Милеј се потпира на извозот на нафта, гас и минерали како дел од напорите за трансформација на економијата и намалување на долготрајниот недостиг на долари.

— реклама —

Деталите за договорот ги објавија заменик-државниот секретар на САД, Кристофер Ландау, и аргентинскиот министер за надворешни работи Пабло Кирно во Њујорк, на маргините на Генералното собрание на Обединетите нации.

САД минатата година го поддржаа и пакетот помош од Меѓународниот монетарен фонд за Аргентина, вреден 20 милијарди долари, а одобрија и посебна валутна линија за размена во вредност од 20 милијарди долари, наменета за стабилизирање на аргентинскиот пезос.

Двете земји претходно годинава потпишаа и договор за слободна трговија.

Аргентина располага со значајни резерви на литиум и бакар, минерали кои имаат важна улога во глобалниот премин кон почисти извори на енергија.