САД ќе пренесуваат во живо егзекуција со стрелање: На 3 декември ќе биде погубен убиец на 13 лица

Соединетите Американски Држави ќе го пренесуваат во живо извршувањето на смртната казна со стрелање врз Нидал Малик Хасан, поранешен воен психијатар осуден за убиство на 13 лица во американската воена база Форт Худ во Тексас во 2009 година. Егзекуцијата е закажана за 3 декември, а Пентагон потврди дека јавноста ќе може да ја следи преку директен пренос.

Претставник на американското Министерство за одбрана за „Ројтерс“ изјавил дека егзекуцијата ќе се пренесува во живо, но не открил на која платформа ќе биде достапна, ниту како ќе биде организиран преносот.

— реклама —

„Ќе има пренос во живо. Деталите ќе бидат објавени дополнително“, изјавил претставникот, кој побарал да остане анонимен.

Одлуката претходно ја најавил американскиот министер за одбрана Пит Хегсет, кој изјавил дека извршувањето на смртната казна треба да биде јавно.

„Ќе се погрижиме луѓето да можат да го гледаат тоа, да биде јавно“, изјавил Хегсет, образложувајќи дека јавноста треба да ги разбере сериозните последици од ваквите злосторства.

— реклама —

Хасан, поранешен мајор во американската армија, на 5 ноември 2009 година отворил оган во воената база Форт Худ, каде што работел како психијатар. Во нападот убил 13 лица, а ранил уште 32.

Во 2013 година воен суд го прогласил за виновен и му изрекол смртна казна.

— реклама —

Американскиот претседател Доналд Трамп го одобрил извршувањето на казната по препорака на министерот за одбрана Хегсет.

Егзекуцијата е закажана за 3 декември во 13 часот по локално време, во истата воена база каде што бил извршен нападот.

Според „Ројтерс“, ова ќе биде првпат од 1945 година американската војска да изврши смртна казна со стрелање. Последната воена егзекуција во САД, независно од начинот на извршување, била во 1961 година.

— реклама —

Најавениот директен пренос би претставувал преседан во современата американска практика на извршување смртни казни. Американските медиуми и претходно барале дозвола за телевизиско емитување егзекуции, но таквите барања биле одбивани од судовите.

Од Пентагон засега не соопштуваат дополнителни детали за организацијата на преносот, ниту дали ќе има ограничувања за неговото следење.