САД кратат дел од воената помош за Македонија, средствата ги пренасочуваат кон Латинска Америка

Соединетите Американски Држави ќе пренасочат дел од воената финансиска помош што досега била предвидена за Македонија и уште три држави, во рамките на новата политика на администрацијата на претседателот Доналд Трамп за поголем фокус кон земјите од Западната хемисфера.

Американскиот Стејт департмент го известил Конгресот дека вкупно 52 милиони долари од програмата за странско воено финансирање, наменети за Македонија, Словачка, Тунис и Ирак, ќе бидат пренасочени кон Панама, Перу, Еквадор и Колумбија, објави „Асошиејтед прес“.

— реклама —

Засега не е познато колкав дел од овие 52 милиони долари бил предвиден конкретно за Македонија, ниту колку средства ќе бидат намалени за земјава.

— реклама —

Од Стејт департментот нагласуваат дека одлуката не значи целосно укинување на американското воено финансирање за четирите држави. Сепак, точниот износ што ќе им остане на располагање по новата распределба сè уште не е објавен.

Македонија и Словачка се членки на НАТО, а одлуката доаѓа во период кога администрацијата на Трамп ги повикува европските сојузници да издвојуваат повеќе средства за сопствената одбрана.

— реклама —

Поголем дел од пренасочените средства сега ќе биде насочен кон Централна и Јужна Америка. Според американската администрација, финансирањето треба да помогне во борбата против трговијата со дрога, обезбедувањето на Панамскиот Канал и спречувањето на зголемено стратешко присуство на други држави во регионот.

Одлуката следува по посетата на американскиот државен секретар Марко Рубио на Колумбија, Еквадор и Перу, каде што најави дополнителна американска поддршка за овие земји.

Програмата за странско воено финансирање им овозможува на партнерските држави со средства од американскиот буџет да набавуваат воена опрема и услуги од американски компании.