САД нудат 20 милиони долари за информации за иранската нуклеарна програма

Американскиот Стејт департмент нуди награда до 20 милиони долари за информации поврзани со иранската нуклеарна програма, вклучително и податоци за научници, персонал, технологии, капацитети и организации поврзани со неа.

Преку програмата „Награди за правда“, Вашингтон ги повика сите што располагаат со такви информации да ги достават преку апликацијата „Сигнал“ или безбедната линија за дојави „Тор“. Покрај парична награда, лицата што ќе помогнат би можеле да добијат и можност за преселување, пренесе „Фокс њуз“.

— реклама —

„Владата на САД останува посветена на спротивставувањето на секој обид на Иран да развие програма за нуклеарно оружје“, се наведува во соопштението објавено на социјалната мрежа Икс.

— реклама —

Понудата доаѓа во период кога американскиот претседател Доналд Трамп ја разгледува можноста за обновување на воените напади врз Иран, додека Вашингтон и Техеран продолжуваат со преговорите за иранската нуклеарна програма.

Трамп во петокот повтори дека Иран никогаш нема да добие нуклеарно оружје. Ден претходно одржал состанок со тимот за национална безбедност, на кој била разгледана можноста за продолжување на нападите.

— реклама —

„Дали сакаме да продолжиме со нападите за да се осигуриме дека иранската нуклеарна програма е уништена и дека тоа никогаш повеќе нема да се повтори? Повеќе би сакал да го избегнам уништувањето на остатокот од Иран, но можеби сепак би можел да го направам тоа“, изјави Трамп пред новинарите во Овалната соба.

— реклама —

Во меѓувреме, американската Централна команда ги привршува подготовките за евентуално продолжување на големите воени операции во Иран. Сепак, според изјава на американски функционер, сè уште нема добиено нова наредба од Вашингтон.

„Фокс њуз“ пренесува и дека високи американски функционери го посочиле младата месечина на 9 ноември, кога има малку или воопшто нема месечева светлина, како услов што би можел да биде поволен за изведување воени операции.