САД одобрија можна продажба на 48 борбени авиони Ф-35 на Саудиска Арабија, во договор чија проценета вредност достигнува 24,3 милијарди долари.
Според американскиот Стејт департмент, Саудиска Арабија побарала набавка на 48 авиони Ф-35 „Лајтнинг II“ со конвенционално полетување и слетување, како и 49 мотори „Прат и Витни F135-PW-100“. Од нив, 48 би биле вградени во авионите, а еден би служел како резервен.
Планираната продажба опфаќа и комуникациска, навигациска и опрема за електронско војување, муниција, резервни делови, опрема за одржување и обука, симулатори, софтвер, техничка документација, како и логистичка, инженерска и техничка поддршка.
Од Стејт департментот наведуваат дека продажбата е поврзана со целите на американската надворешна политика и националната безбедност и дека треба да ја зајакне одбранбената способност на Саудиска Арабија, која САД ја опишуваат како важен сојузник надвор од НАТО и фактор на политичка и економска стабилност во регионот на Заливот.
Според образложението, набавката би требало да ѝ овозможи на Саудиска Арабија подобро да се спротивстави на сегашните и идните закани, да ја зајакне воздушната одбрана и да ја подобри соработката со американските, регионалните и силите на НАТО.
Американската страна наведува дека предложената продажба нема да ја промени воената рамнотежа во регионот ниту негативно да влијае врз одбранбената подготвеност на САД.
Главни изведувачи на договорот би биле „Локхид Мартин Аеронаутикс“ од Форт Ворт, Тексас, и „Прат и Витни милитари енџинс“ од Ист Хартфорд, Конектикат.
Од американската Влада додаваат дека засега не се запознаени со предлог-договор за компензација поврзан со потенцијалната продажба. За реализацијата на договорот, исто така, не би било потребно дополнително распоредување американски владини претставници или лица ангажирани од изведувачите во Саудиска Арабија.
