Тензиите меѓу САД и Иран дополнително ескалираа откако американските сили изведоа серија напади врз повеќе воени цели во Иран, како одговор на нападите врз три комерцијални танкери во Ормускиот теснец.
Според Централната команда на американската војска (ЦЕНТКОМ), во операцијата биле погодени повеќе од 80 цели, меѓу кои над 60 пловни објекти на Иранската револуционерна гарда, како и ракетни позиции и командни центри.
„Акцијата е одговор на нападите врз цивилни трговски бродови што пловеа по меѓународен поморски коридор. Освен пловилата, уништени се и локации за лансирање ракети и командни објекти“, соопшти ЦЕНТКОМ.
Иранските медиуми објавија дека мета на американските напади биле островот Кешм, како и подрачјата Бандар Абас и Сирик, каде што, според нив, има повредени лица.
Иако Техеран официјално не ја презеде одговорноста за нападите врз танкерите, Катар и Саудиска Арабија го обвинија Иран дека стои зад инцидентите во Ормускиот теснец.
Во меѓувреме, Иранската револуционерна гарда соопшти дека како одговор извршила ракетни напади врз американски воени бази во Кувајт и Бахреин.
Иранското Министерство за надворешни работи ги осуди американските акции, оценувајќи дека Вашингтон грубо го прекршил меморандумот за разбирање потпишан минатиот месец и најави дека Иран ќе одговори со „решителни мерки“.
Во пресрет на нападите, американските власти ја поништија одлуката за привремено олеснување на нафтените санкции кон Иран, која беше дел од претходниот договор меѓу двете земји.
