И покрај засилените воени подготовки, САД во моментов ѝ даваат предност на дипломатијата во обид да се намалат тензиите со Иран, објави Си-Ен-Ен, повикувајќи се на американски претставници.
Според американски функционер, Вашингтон применува стратегија на ограничени воени удари, по кои следува привремена пауза, со цел да се избегне понатамошна ескалација и да се создаде простор за дипломатско решение. Истовремено, САД и понатаму располагаат со список на потенцијални цели, кој служи како средство за притисок.
Неколку американски претставници изјавиле дека постојат подготовки за можни нови напади доколку тоа стане неопходно, но дека во оваа фаза е донесена одлука приоритет да имаат дипломатските активности.
Во меѓувреме, на американскиот носач на авиони „USS Abraham Lincoln“ во Арапското Море, екипажите ги подготвуваат борбените авиони, а пилотите спроведуваат вежби за евентуални борбени мисии.
Командантот на носачот ги информирал членовите на екипажот дека безбедносната состојба во регионот се влошува и нагласил дека е неопходно да се одржува највисоко ниво на борбена готовност.
Американските претставници, исто така, ги отфрлија тврдењата на Иран дека САД веќе извеле нови воздушни напади во текот на ноќта, оценувајќи ги како неточни. Сепак, тие предупредија дека ситуацијата останува променлива и дека, доколку околностите го наложат тоа, нови воени операции не се исклучени.
