Соединетите Американски Држави водат преговори со Украина и европските партнери за заедничко производство на ракети за системите „Патриот“, но договор најверојатно нема да биде постигнат пред почетокот на зимата.
Ова го изјави американскиот амбасадор во НАТО, Метју Витакер, кој посочи дека Вашингтон разгледува можности за соработка со Украина и европските сојузници со цел да се зајакне одбранбената индустриска база.
Според него, разговорите продолжиле по средбата меѓу американската и украинската делегација во Турција, а потоа биле одржани дополнителни состаноци во Киев и со компании што располагаат со потребната технологија.
Витакер нагласи дека моментален приоритет е што побрзо да се испорачаат системи за противвоздушна одбрана во Украина пред претстојната зима.
„Долгорочниот договор за производство на ракети-пресретнувачи за ‘Патриот’ нема да биде готов до зимата. Ќе продолжиме да работиме на тоа“, изјави тој.
Американскиот претседател Доналд Трамп претходно најави дека САД би можеле да ѝ одобрат на Украина лиценца за производство на системите „Патриот“, но подоцна изјави дека конечната одлука сè уште не е донесена и дека Вашингтон мора да биде „многу внимателен“.
