Соединетите Американски Држави првпат го употребиле стратегискиот бомбардер Б-1 во нападите врз цели на Иран од обновувањето на судирите пред 12 дена, објави американскиот портал „Аксиос“, повикувајќи се на американски претставници.
Според информациите, бомбардерот бил ангажиран во напад врз цели поврзани со Корпусот на Исламската револуционерна гарда (ИРГЦ), што, според изворите, претставува значително проширување на американската воена кампања.
Б-1 може да носи десетици крстосувачки ракети или до 24 бомби со тежина од околу 900 килограми, а неговото вклучување во операциите се оценува како дополнителна ескалација на конфликтот. Според американските претставници, леталото полетало од воздушна база во Велика Британија.
Американската Централна команда (ЦЕНТКОМ) соопшти дека во текот на денот биле изведени напади врз ирански воени оперативни центри, поморски капацитети, хангари за авиони, складишта за беспилотни летала и логистичка инфраструктура, со цел да се намалат можностите на Иран да го загрозува поморскиот сообраќај во Ормускиот теснец.
Засега не е соопштено кои конкретни цели ги погодил бомбардерот Б-1, ниту какви биле резултатите од неговата мисија.
Во меѓувреме, американското воено присуство во регионот дополнително се засилува, додека американскиот претседател Доналд Трамп разгледува можност за проширување на воените операции против Иран. Американски и израелски претставници, според „Аксиос“, оценуваат дека таков потег би можел да следува во наредните денови.
Во написот се наведува дека Иран продолжил со нападите врз американски бази во регионот и останал на своите позиции во однос на Ормускиот теснец, еден од најважните светски поморски коридори за транспорт на енергенси.
Истовремено продолжуваат и дипломатските напори. Катарски посредници водат разговори со претставници на САД, Иран и Оман во обид да се постигне договор за повторно отворање на Ормускиот теснец и намалување на тензиите. Според регионални извори, иранското раководство сè уште не го прифатило последниот предлог на посредниците.
