Сајбер напад врз стотици супермаркети во Франција, уништена свежа и замрзната храна

Стотици супермаркети во Франција се соочија со сериозни проблеми откако сајбер напад ги погоди нивните системи за ладење, поради што дел од продавниците мораа да ја фрлат свежата и замрзнатата храна.

Нападот го потврдија малопродажните синџири Интермарше и Кооператив У. Според достапните информации, биле погодени меѓу 150 и 200 продавници на Интермарше и речиси 100 филијали на Кооператив У. Се проверува и можноста нападот да зафатил продавници на други големи синџири, меѓу кои Леклерк, Карфур Маркет и Моноприкс, но тие засега не ја потврдиле информацијата.

— реклама —

Според првичните сознанија, напаѓачите успеале далечински да ги активираат циклусите на одмрзнување на опремата за ладење во дел од продавниците. Тоа предизвикало проблеми со чувањето на храната и потреба од отстранување на производите за кои веќе не можело да се гарантира соодветно складирање.

Од Интермарше соопштиле дека погодените продавници ќе мора да ги фрлат сите свежи и замрзнати производи. Компанијата го осуди уништувањето на храната и финансиските загуби, но засега не објави конкретни процени за штетата. Посочени се и можни проблеми со осигурувањето, бидејќи ваквите инциденти не секогаш се опфатени со полисите.

— реклама —

Извршниот директор на Кооператив У, Доминик Шешер, го оцени нападот како невиден досега и потврди дека проблемите со системите за ладење траат од претходната вечер.

— реклама —

„Нападот врз опремата што е клучна за зачувување на свежата храна и снабдувањето со храна во Франција е исклучително сериозен и невиден досега. Тоа е неприфатливо“, напиша Шешер на социјалната мрежа Икс.

Тој додаде дека компанијата работи на што побрзо решавање на проблемот, но дека ќе биде потребна детална истрага за целосно да се утврдат околностите на нападот.

— реклама —

Канцеларијата на парискиот обвинител потврди дека е отворена истрага за голем сајбер напад врз системите за ладење во неколку големи малопродажни синџири низ Франција. Истрагата треба да ги утврди погодените продавници и да ја поврзе пријавената штета со загубата на храна и активирањето на противпожарните аларми.

Инцидентот се случува во период на зголемена загриженост во Европа за сајбер нападите врз критичната инфраструктура. Францускиот претседател Емануел Макрон минатиот месец нареди мерки за заштита на критичната инфраструктура на земјата од руски хибридни напади. Засега нема потврда дека и овој напад е поврзан со Русија.